Ministrja në detyrë e Punëve të Jashtme të Kosovës, Meliza Haradinaj Stublla, njoftoi se ka dhënë dorëheqje nga ky post dhe nga të gjitha funksionet në Aleancën për Ardhmërinë e Kosovës.“Këtë vendim e marr vetëm për shkak të pamundësisë morale që më është shkaktuar dhe imazhit që më është dëmtuar nga persona me qëllime të pista, e jo sepse ndjej përgjegjësi për manipulimet dhe akuzat që më janë mveshur pamëshirshëm mua dhe familjes sime. Cenimi i nderit dhe punës sime nga lojërat denigruese të të tjerëve paraqet shkak-pasojën e këtij vendimi”, shkroi Haradinaj Stublla në rrjetin social Facebook.Haradinaj Stublla iu referua raportimeve nga një media lokale në Kosovë për, siç është thënë, falsifikimin e votave të kandidatëve të AAK-së.Së fundmi në media ka qarkulluar një video ku pretendohet se bashkëshorti i Haradinaj-Stubllës i ka blerë votat asaj në zgjedhjet e 14 shkurtit. Sipas kryediplomates, kjo është bërë nga persona me qëllime të pista. Haradinaj Stublla ripërsëriti kërkesën e saj që “në interval sa më të shkurtër kohor, Prokuroria e Shtetit të ndriçojë vërtetësinë e video-inskenimit”.Haradinaj-Stublla tha ndërkohë se është e lumtur që pas 15 viteve bashkëpunim me AAK-në, tani “në paqe që po largohem nga prezenca toksike e disa njerëzve që AAK-në e bëjnë parti të pareformueshme, dhe kryetarin Haradinaj të izoluar”. Më herët, kandidatja për deputete nga AAK-ja, Florentina Gjergjaj, kishte akuzuar publikisht bashkëanëtaren e partisë së saj Meliza Haradinaj-Stublla se ia kishte vjedhur votat. Ndërsa, të hënën PZAP-ja miratoi ankesën e Gjergjajt që të rinumërohen fletëvotimet me kusht në të gjitha komunat e Kosovës dhe të gjitha fletëvotimet nga diaspora, sa i përket kandidatëve të AAK-së.