Sali Berisha nuk ja doli mbanë që të hynte në zgjedhjet e 14 majit me siglën dhe vulën e Partisë Demokratike, por fushatën zgjedhore për këto zgjedhje e hapi me një dokumentar historik, që nga protestat studentore, te themelimi i PD e deri te Kuvendi i 11 dhjetorit 2021. Dokumentari ishte një rezyme i të gjithë aktivitetit politik të Partisë Demokratike, ku figurë qendrore në dokumentar ishte Sali Berisha, si udhëheqësi historik i saj. Materiali nisi me protestat e 1991, themelimin e PD-së, vizitën e Sekretarit të Shtetit James Baker, vijonte më pas me përballjen e PD-së me qeverisjen e Fatos Nanos, që aty përshkruhej si thellësisht e korruptuar dhe e kriminalizuar. Vijonte më pas me ardhjen në pushtet, anëtarësimin në NATO, liberalizimin e vizave dhe arritjet e tjera të qeverisë së Berishës në dy mandate, ku Ilir Meta, protagonist në mandatin e dytë të Berishës anashkalohej. Vijonte më pas me sfidat e demokratëve në opozitë pas 2013-s, protestat e vitit të kaluar e të këtij viti dhe beteja të tjera përballë Ramës. Por, ajo që ra në sy në këtë dokumentar ishte zhdukja nga historia e PD-së e Lulzim Bashës, ndonëse ky i fundit e drejtoi atë de facto nga 2013-ta deri në mars të vitit të kaluar dhe de jure vijon të jetë ende kryetar i saj.