Shërbimi Federal i Sigurisë në rusi, tha të enjten se kishte dekonspiruar disa komplote nga shërbimet e inteligjencës ukrainase për të vrarë oficerë të lartë rusë dhe familjet e tyre në Moskë duke përdorur bomba të fshehura në pajisje të ndryshme. Më 17 dhjetor, shërbimi i inteligjencës i Ukrainës SBU vrau gjeneral-lejtnant Kirillov, shefin e Trupave të Mbrojtjes Bërthamore, Biologjike dhe Kimike të Rusisë, në Moskë, jashtë ndërtesës ku ai banonte pasi një bombë e fshehur në një skuter elektrik, shpërtheu. Një burim i SBU konfirmoi për Reuters se agjencia e inteligjencës ukrainase kishte qenë pas goditjes. Rusia tha se vrasja ishte një sulm terrorist nga Ukraina. “Shërbimi Federal i Sigurisë, i Federatës Ruse, ka parandaluar një seri atentatesh ndaj personelit të lartë ushtarak të Ministrisë së Mbrojtjes”, tha FSB. “Katër shtetas rusë të përfshirë në përgatitjen e këtyre sulmeve janë arrestuar”, thuhet në një deklaratë. FSB, pasardhësi kryesor i KGB-së së epokës sovjetike, tha se qytetarët rusë ishin rekrutuar nga shërbimet e inteligjencës ukrainase. Një nga të arrestuarit kishte fshehur një bombë në një karikues portativ në moskë, që do të lidhej me makinën e një prej zyrtarëve të lartë të Ministrisë së Mbrojtjes, tha FSB. Një tjetër rus ishte ngarkuar me zbulimin e zyrtarëve të lartë të mbrojtjes ruse, dhe në këtë komplot përfshihej dorëzimi i një bombe të maskuar si një dosje dokumentesh. Data e saktë e sulmeve të planifikuara mbetet e paqartë, sipas FSB-së.