Drejtoria e Përgjithshme e Tatimeve thotë se ka bllokuar 60 tonë produkte blegtorale dhe bujqësore pa faturë gjatë aksionit ku ka kontrolluar 151 subjekte. Sipas njoftimit, kontrollet janë shtrirë në qarqet Tiranë, Durrës, Fier, Lezhë dhe Korçë, me qëllim formalizimin e tregut dhe përmirësimin e sigurisë ushqimore. Megjithatë, aksioni është pritur me kritika. Deputeti socialist, Erion Braçe e konsideroi atë si varrosës të fermerit, jo aksion për sigurinë ushqimore. Në një postim në rrjetet sociale, ai kritikon ligjin për TVSH, që sipas deputetit godet fermerin duke e bërë atë të pakonkurrueshëm në treg. Braçe sjell rastin e një baxhoje në Divjakë, që nuk kishte fatura tatimore për qumështin e blerë nga fshatarët. Në këtë aksion, tatimet dhe AKU kanë sekuestruar 33 mijë kilogramë djathë. Tatimet kanë nisur prej datës 14 korrik aksionin për formalizimin e tregut të shitjes së qumështit dhe nënprodukteve të tij, ndërsa pjesë e kontrolleve janë edhe thertoret dhe dyqanet e shitjes së mishit.