Nisja e pjesëtarëve të Forcës së Sigurisë së Kosovës (FSK) në misionin e parë paqësor jashtë vendit, përkatësisht në Kuvajt, të martën u cilësua si ditë historike nga udhëheqësit politikë në Kosovë. Në ceremoninë e zbarkimit të kontingjentit të Forcës së Sigurisë të Kosovës në misionin e parë paqësor jashtë vendit, ushtruesja e detyrës së presidentit, Vjosa Osmani, tha se misioni paqeruajtës gjashtëmujor u bë falë Shteteve të Bashkuara. “Programi i partneritetit shtetëror me ushtrinë amerikane ka qëllim afatgjatë dhe ka për qëllim krijimin dhe zgjerimin e partneritetit me FSK-në, në funksion të promovimit të sigurisë rajonale, por edhe më gjerë. Sot një nga këta objektiva po nis përmbushjen e tij” Kontingjenti i FSK-së, që niset për në Kuvajt, do të jetë si pjesë e Gardës Kombëtare të Ajovas. Osmani, në cilësinë e Komandantes Supreme të FSK-së tha se me misionin në Kuvajt, “Forca jonë po merr rol në sigurinë dhe paqen globale”. Nuk është bërë i ditur ndërkohë numri i pjesëtarëve të FSK që marrin pjesë në misionin në Kuvajt dhe as profili i tyre. Kosova ka partneritet shtetëror me Ajovan, Garda Kombëtare e së cilës ndihmon FSK-në në ngritjen e saj dhe konsolidimin në ushtri. FSK-ja pritet të ofrojë mbështetje në operacionet paqeruajtëse në regjionin e Komandës Qendrore amerikane. Vendimi për dërgimin e kontingjentit të FSK-së në misionin e parë jashtë vendit u morr më 31 dhjetor, 2020. Më 2018, përmes ndryshimeve ligjore ka nisur transformimi i mandatit të FSK-së në forca të armatosura. Ky proces pritet të zgjasë dhjetë vjet.