I vetmi ndryshim që prodhoi vota e diasporës, kur janë numëruar mbi 90 për qind e fletëve të ardhura nga jashtë është përmbysja e rezultatit të votës preferenciale për kandidatët brenda koalicionit të PD-së në Qarkun e Kukësit. Pas numërimit të këtyre votave, rezulton se deputeti aktual i Kuvendit, Isuf Ccela ka tejkaluar Shkëlqim Shehun, që printe garën për mandatin e dytë të Partisë Demokratike në Qarkun e Kukësit. Numërimi i mbi 80 për qind të votave në këtë qark nxorri me gati 50 vota në avantazh Isuf Ccelën, që i rimerr mandatin Shkëlqim Shehut. Ndërkohë, shpresat e Nismës Shqipëria Bëhet për të siguruar mandatin e dytë në rang kombëtar në Qarkun e Fierit u shuan. Pak para përfundimit të numërimit të votës së diasporës, Partia Socialiste siguroi edhe matematikisht mandatin e 12 në këtë qark.