Zëvendëskryeministri në detyrë i Kosovës, Besnik Bislimi, është marrë në pyetje rreth një orë e gjysëm në cilësinë e dëshmitarit nga Prokuroria Speciale e Kosovës për hetimet mbi dyshimet për dhënien me qira të fabrikës për mbetje shtazore në Drenas. Përmes një postimi në FaceBook, Bislimi shkruan se prokurorët nuk i parashtruan asnjë pyetje "që mund të cilësohet si pyetje drejtuar një dëshmitari". "Arrita të konfirmoj që të gjitha informacionet që prezantova sot kanë mund të grumbullohen shumë lehtë pa pasur nevojë fare për intervistim. Do të kishte mjaftuar një studim minimal për detyrat dhe përgjegjësitë e zëvendëskryeministrit brenda portfolios së integrimeve evropiane dhe një shfletim i shpejtë i raporteve për vendin ndër vite nga Komisioni Evropian", shkroi Bislimi në postim. Po ashtu, zëvendëskryeministri akuzoi Prokurorinë se përmes kësaj marrje në pyetja, ka dashur që të bëjë bujë mediatike. Bislimi ishte ftuar në Prokurori në kuadër të hetimeve që lidhen me kontratën për mbetjet nën shtazore, të Ministrisë së Bujqësisë, e drejtuar nga ministri në detyrë Faton Peci. Dyshohet se nuk u përmbushën kriteret që fituesi i kontratës të kishte përvojë 12 deri në 15-vjeçare në përpunimin e nënprodukteve shtazore, dhe të dëshmonte se në tre vitet e fundit kishte përpunuar 20 mijë tonë të nënprodukteve shtazore.