Grupi i dytë i protestueve të 10 shkurtit, të cilët dyshoheshin për kryerjen e veprimeve të dhunshme ndaj efektivë të policisë u lanë të lirë nga gjykata penale e Tiranës. 14 protestues u liruan me vendim të gjyqtarit Sokol Mara i cili nuk mori parasysh kërkeksën e prokurores për të caktuar masa shtrnguese ndaj 5 prej tyre, konkretisht dy arrest në burg dhe 3 arrest në shtëpi. Një ditë më parë, e njëjta gjykatë la të lirë edhe 7 të miturit që u arrestuan në të njëjtën protestë që u organizua nga Partia Demokratike në Bulevardin Dëshmorët e Kombit. Protesta e thirrur nga kryetari i Partisë Demokratike Sali Berisha u shoqërua me përplasje mes protestuesve dhe efektivëve, ku mbetën të plagosur 16 prej tyre. Të dëmtuar mbetën edhe disa protestues, në mesin e të cilëve edhe deputeti Bledion Nallbati i cili u shoqërua te spitali i Traumës për të marrë mjekim. Protesta u përshkallëzua përpara Parlamentit, aty ku policia përdori gaz lotsjellës dhe ujë për të shpërndarë protestuesit. Pas protestës që u zhvillua të martën, Berisha njoftoi një tjetër protestë kombëtre e cila do të mbahet në datë 20 shkurt po përpara kryeministrisë. Prokuroria e Tiranës ndërkohë, po heton në gjendje të lirë deputetët, Luan Baçi, Belind Këlliçi, Flamur Noka dhe Luçiano Boçi, si edhe sekretarin organizativ Ervin Minarolli.