Ka dështuar për të dymbëdhjetën here konstituimi i Kuvendit të Kosovës. Edhe në seancën e kësaj të mërkure deputetët nuk votuan për formimin e komisionit për votim të fshehtë. Në sallë ishin prezentë gjithsej 113 deputetë, ku 56 votuan pro, 1 kundër dhe pjesa tjetër nuk votuan. PDK, LDK, AAK-Nisma dhe Lista Serbe, janë partitë që nuk kanë votuar formimin e komisionit për votë të fshehtë dhe nuk kanë propozuar asnjë kandidat për këtë komision, pasi sipas tyre, Vetëvendosja ka bërë shkelje kushtetuese, ligjore e procedurale duke e futur propozimin për votim të fshehtë në mes të seancës e jo prej fillimit kur ka nisur tentimi për konstituimin e Kuvendit të Kosovës. Kryesuesi i seancës konstituive të Kuvendit të Kosovës, Avdi Dehari, tha vazhdimi i seancës do të mbahet të premten, në orën 10:00.