Tajlanda ka dërguar tanke dhe artileri në kufirin e saj me Kamboxhian pasi një marrëveshje armëpushimi mes dy vendeve dështoi, vetëm dy javë pasi u nënshkrua. Armëpushimi, të cilin Donald Trump u mburr se e ndërmjetësoi, u prish të hënën pasi katër ushtarë tajlandezë u plagosën nga minat tokësore në rajonin e diskutueshëm kufitar mes dy vendeve. Kryeministri i Tajlandës, njoftoi pezullimin e marrëveshjes dhe tha se "veprimet armiqësore ndaj sigurisë kombëtare të vendit nuk ishin ulur siç mendohej". Lufta mes Tajlandës dhe Kamboxhias shpërtheu në maj për shkak të një mosmarrëveshjeje të gjatë kufitare. Gati 50 persona u vranë në konfliktin që zgjati për disa javë, dhe qindra mijëra të tjerë u zhvendosën. Kamboxhia mohoi se ishte përgjegjëse për lëndimet e pësuara nga ushtarët tajlandezë. Zyrtarët sugjeruan se eksplozivët ishin mbetje nga konfliktet e viteve 1970 dhe 1980, kur miliona mina tokësore u vendosën nga fraksionet ndërluftuese në rajon, dhe kur SHBA gjithashtu kreu sulme me bomba gjatë Luftës së Vietnamit. Megjithatë, ekspertë të pavarur dhe zyrtarë tajlandezë thanë se kishte prova se forcat kamboxhiane kishin vendosur mina të reja tokësore më vonë.