Zgjedhjet e pjesshme vendore të 6 marsit rrëzuan edhe njëherë kreun e Partisë Demokratike Lulzim Basha, duke shënuar humbjen e 6 për këtë të fundit. Shpresa e fundit e Bashës, u shua më 6 mars ku PD doli forcë e tretë në të gjashta bashkitë, duke nxitur kështu një tjetër konflikt me rivalin e tij Berishën. Pas përcarjes së PD më 9 shtator, ku Basha përjashtoi Berishën nga grupi parlamentar, opozita po kalon nga përcarja në përcarje, ku dueli nuk është më me Ramën, por tanimë përballja politike është mes Berishës e Bashës. Rezultati i zgjedhjeve të 6 marsit, nxiti debate të shumta brenda partisë, ku shumica e deputetëve kërkuan dorëheqjen e Bashës, ndësa e vetmja që qëndroi krahë tij ishte Oriola Pampuri. Nga ana tjetër, nënkryetari i PD Agron Gjekmarkaj, hoqi dorë nga të gjitha funksionet në PD, pasi e quan veten fajtor pas këtij rezultati të turpshëm. Grida Duma dhe Ervin Salianji kanë qenë ndër të parët deputetë që dolën krahë Bashës dhe tashmë të parët që kërkojnë dorëheqjen e tij. Deputeti Ervin Salianji, përmes një reagimi në Facebook, shkruan se rezultati i zgjedhjeve të 6 Marsit ishte katastrofik për Partinë Demokratike.