Gjykata e Kombeve të Bashkuara në Hagë dënoi me nga 12 vjet burg dy ish-shefa të shërbimit të sigurimit shtetëror të Serbisë, të akuzuar për udhëheqjen e grupeve paraushtarake gjatë luftërave në ish-Jugosllavi, në vitet 1990. Të dënuarit janë Jovica Stanishic, 70 vjeç, ish-shef i shërbimit të sigurimit shtetëror të Serbisë, dhe zëvendësi i tij, Franko Simatovic, 71 vjeç. Prokuroria kishte kërkuar burgim të përjetshëm, ndërsa mbrojtja, lirimin e tyre. Grupet paraushtarake, të udhëhequra nga ta, përfshinin dy njësi elitare, Beretat e Kuqe dhe Tigrat e Arkanit. Të dyja njësitë dyshohet se kanë vrarë qindra njerëz. Gjykata në Hagë ka liruar Stanishicin dhe Simatovicin nga akuzat për krime lufte dhe krime kundër njerëzimit në vitin 2013. Por, pas protestave dhe apelit të prokurorëve, gjykatësit kanë urdhëruar në vitin 2015 rigjykim të rastit kundër tyre. Rigjykimi ka nisur në vitin 2017. Të dy të pandehurit janë deklaruar të pafajshëm për krime kundër njerëzimit, të tilla si: përndjekjet, vrasjet, dëbimet dhe transferimet me forcë. Të dy kanë qenë bashkëpunëtorë të ngushtë të ish-presidentit serb, Sllobodan Milloshevic, i cili ishte përgjegjësi kryesor për luftërat në Slloveni, Kroaci, Bosnje e Hercegovinë dhe Kosovë. Milloshevic është gjykuar po ashtu në Hagë, por vdiq përpara se t’i shqiptohej dënimi, në vitin 2006.