Presidenti rus Vladimir Putin dhe të gjithë vartësit e tij, nuk kanë pranuar në asnjë moment pushtimin e Ukrainës, por ata janë shprehur se po luftojnë nazizmin, apo thënë ndryshe, synojnë denazifikimin e këtij shtetit. Nëpërmjet kësaj retorike, Rusia është përpjekur të justifikojë agresionin ushtarak në Ukrainë, nga ku janë shkaktuar mijëra viktima. Por një deklaratë e tillë vjen edhe nga Serbia, që është vendi i vetëm në Ballkan, që nuk ka pranuar tu bashkohet sanksioneve perëndimore ndaj Rusisë, si ndëshkim për luftën në Ukrainë. Vladimir Gjukanoviçit, deputet i Partisë Progresive Serbe në pushtet, partia e presidentit Aleksandar Vuçiç, nëpërmjet një reagimi në Twitter është shprehur se Serbia do të detyrohet të nisë denazifikimin e Ballkanit. Gjukanoviç përdori terminologjinë që Rusia zyrtare e promovoi publikisht si arsye për agresion ushtarak kundër Ukrainës. Mijëra të vdekur, disa milionë refugjatë ukrainas, si dhe shkatërrimin e infrastrukturës, Rusia zyrtare e justifikon me zbatimin e “denazifikimit dhe çmilitarizimit” të Ukrainës.