Muaji shkurt ka nisur me temperatura të ulërta në vend, ku disa nga zonat janë përfshirë nga reshje të dendura të shiut gjatë natës por edhe mëngjesin e kësaj të marte, ndërsa disa zona të tjera përfshirë zonat malore janë mbuluar nga dëbora. Si pasojë e reshjeve të dendura të dëborës, disa nga akset rrugore në vend paraqesin rrezikshmëri në kalim dhe thuajse janë të bllokuara, derisa mjetet e borëpastrueses të pastrojnë rrugët. Auoriteti rrugor shqiptar ka bërë me dije situatën në vend, ku njofton drejtuesit e mjeteve të mos qarkullojnë në disa nga rrugët që janë të bllokuara, si dhe bën me dije akset që nuk paraqesin problem në qarkullim. Në njoftimin e publikuar nga ARRSH në Facebook bëhet me dije se reshje dëbore ka pasur në: Qafë Thanë-Kapshticë, Boboshticë-Dardhë, Korçë-Ersekë-Leskovik, Bajram Curri-Valbonë, Kukës-Ura e Zapodit, Qafë Mali-Fierzë, Tamarë-Vermosh, Dedaj-Razëm, Bogë-Theth, Kuben-Vasije, Qafë Qelë-Pukë-Fushë Arrëz-Fushë Dukagjin, pa sjellë probleme me qarkullimin. Autoriteti rrugor shqiptar njofton se kontraktorët janë në terren me mjete borëpastruese për pastrimin e rrugës dhe shpërndarjen e kripës.