Një pjesë muzikore klasike do të luhet në hapësirë për të festuar 200-vjetorin e lindjes së kompozitorit të saj dhe 50-vjetorin e Agjencisë Hapësinore Evropiane, ESA. “Danubi blu”, nga Johann Strauss, do të transmetohet në kozmos teksa interpretohet nga Orkestra Simfonike e Vjenës, më 31 maj, ndërsa do të ketë edhe transmetim të drejtpërdrejtë në shfaqje publike falas në Vjenë, Madrid dhe Nju Jork. Për të shmangur çdo problem teknik, do të luhet një version i regjistruar nga prova e orkestrës një ditë më parë, ndërsa një performancë live do të shoqërojë transmetimin. Muzika, e cila u shfaq në filmin e famshëm të Stanley Kubrick të vitit 1968, “2001: A Space Odyssey”, do të kalojë pranë hënës në vetëm 1.5 sekonda. Duke u nisur nga antena e madhe e ESA-s në Spanjë, pjesë e rrjetit hapësinor të agjencisë, ajo do të kalojë pranë Marsit për 4.5 minuta, pranë Jupiterit për 37 minuta dhe pranë Neptunit për katër orë. Nëse gjithçka shkon sipas planit, Voyager 1 i NASA-s, anija kozmike më e largët në botë, do të arrihet brenda 23 orësh, kur sinjalet do të jenë më shumë se 15 miliardë milje në hapësirën ndëryjore. Zyrtarët e turizmit në Vjenë, ku lindi Strauss në tetor 1825, thanë se transmetimi në hapësirë i "valsit më të famshëm nga të gjithë" korrigjon "gabimin kozmik" të lënies së muzikës së tij jashtë transmetimeve të mëparshme ndëryjore.