“Nuk besoj se dallimet ndëretnike shkaktojnë konflikt në Ballkanin Perëndimor”, është shprehur kryeministri i Kosovës, Albin Kurti, pas mbledhjes së përbashkët të dy qeverive, Prishtinë- Shkup, ku u pyet në lidhje me shqetësimet e ngritura se situata në Maqedoninë e Veriut mund të sjellë konflikte etnike. “Mund të ketë dëshira, por nuk besoj se ka më pikëpamje të etabluara sikurse ishin në vitet 90-ta, të nxitura nga Beogradi”, është shprehur Kurti. I pyetur për Ligjin për përdorimin e gjuhëve gjuhët në Maqedoni të Veriut, Kurti tha se është çështje e Gjykatës Kushtetuese. “Kjo është një çështje e Gjykatës Kushtetuese në Maqedoni të Veriut. Janë tri dispozita nuk janë zbatuar në të kaluarën dhe i përket Gjykatës Kushtetuese të vlerësojë këtë. Duhet të presim për një vendim të drejtë të Gjykatës Kushtetuese atje. Në Maqedoni të Veriut nuk mund të thuhet se gjuha shqipe ka qenë zyrtare dhe tani po rrezikohet”, ka thënë Kurti. Sakaq, kryeministri i Maqedonisë së Veriut, Mickoski u shpreh se temat etnike po hapen vetëm nga politikanë, të cilët tha se “s’kanë idenë për nevojat e qytetarëve”. Në lidhje për Ligjin për gjuhët ai tha se pret vendimin e Gjykatës Kushtetuese. Ligji për përdorimin e gjuhëve në Maqedoni të Veriut i detyron institucionet shtetërore të lejojnë përdorimin zyrtar të gjuhëve që fliten nga të paktën 20 për qind e qytetarëve, ku bën pjesë dhe gjuha shqipe.