Ambasada Gjermane në Tiranë ka dhënë një lajm të keq për të gjithë shqiptarët që duan të pajisen me vizë pune, apo qëllime të tjera në Gjermani. Prej kësaj të mërkure, nisur nga gjendja aktuale e pandemisë covid 19, Zyra e Vizave dhe e Pasaportave të Ambasadës Gjermane në Tiranë është e mbyllur për arsye parandaluese. Personat e prekur nga mbyllja e zyrës do të marrin në momentin më të parë të mundshëm një datë/orë të re aplikimi – thuhet nga Ambasada në një njoftim të saj në faqen e facebook, ku shkruhet gjithashti se për cdo njoftim të ri, informacioni do bëhet publik jo vetëm në rrjetet sociale, por edhe në faqen zyrtare në internet. Por, ambasada ka edhe një sqarim për rastet urgjente konsullore, për të cilat kërkon të kontaktohet përmes numrit të shërbimit të gatshëm. Ambasada kërkon mirëkuptimin e qytetarëve për një vendim të tillë, ndërsa nuk ngurron të japë informacione telefonike rreth datave të aplikimit apo procedurave për vizë.