Në harkun kohor të 24 orëve të fundit janë shënuar 82 raste të reja me covid 19, ndërsa nuk ka pasur viktima, si ndër të paktat ditë që nga fillimi i qershorit. Por ndryshe nga më parë, Ministria e Shëndetësisë bën me dije se ka më shumë të shtruar në spital, duke vënë në situatë vështirësie stafet mjekësore. Kanë vijuar testimet për të dyshuar të prekur me Covid19 dhe vazhdon puna intensive e epidemiologëve në terren për gjurmimin aktiv të rasteve. Situata në spitalin infektiv paraqitet serioze. Është rritur numri i të shtruarve dhe rëndohet situata shëndetësore e pacientëve në terarapi intensive. Aktualisht janë të shtruar 84 pacientë në spital, 11 pacientë janë në terapi intensive në gjendje serioze dhe 6 prej tyre janë të intubuar, në gjendje të rënde. Gjatë 24 orëve të fundit janë kryer 401 testime për të dyshuar të prekur me COVID19, nga të cilat janë konfirmuar 82 raste pozitive. Shpërndarja gjeografike e rasteve nuk ka pësuar ndryshime të mëdha. Tirana dhe Shkodra kanë numrin më të madh të të infektuarve, ndërsa Elbasani ka shënuar 5 raste nga e njëjta familje. Autoritetet mjekësore bëjnë sërish thirrje për kujdes të shtuar nga të gjithë.