Infektimet dhe numri i viktimave nga covid 19 në vendin tonë ka patur një ulje të ndjeshme përgjatë muajit dhjetor, por kjo gjë nuk premton të njëjtën shifër pas festave të fundviti, e sidomos pas shfaqjes së dy rasteve të para të variantit Omicorn në vendin tonë. 7 ka qenë numri i viktimave për shkak të koronavirusit në vend përgjatë 24 orëve të fundit. Me gjithë përpjekjet e mjekëve, në 24 orët e fundit betejën me virusin nuk e fituan një qytetare nga Tirana 55 vjeçe, një qytetare nga Fieri 58 vjeçe, dy qytetarë nga Durrësi të moshave 62-85 vjeç, një qytetar nga Lushnja 65 vjeç, një qytetare nga Berati 66 vjeçe dhe një qytetar nga Vlora 66 vjeç. Ministria e Shëndetësisë ka bërë me dije se në 24 orë janë shënuar 168 raste të infektimeve nga 2241 testime të kryera. Tirana vijon të jetë qarku më I infektuar në vend me 83 raste, e ndjekur nga Durrësi me 10 raste, 8 raste në Fier dhe më pak rastë në qarqet e tjera të vendit. Po gjatë këtij harku kohorë janë shëruar 131 qytetarë, duke e çuar numrin e të shëruarve në 199,517 që nga fillimi i epidemisë në vend. Aktualisht në spitalet COVID po marrin trajtim të specializuar 121 pacientë, nga të cilët 19 janë në gjendje më të rënduar shëndetësore. Ndërkohë, në të gjithë vendin janë 5159 pacientë aktivë me COVID19.