Një rrjet spiunazhi rus përgjegjës për një fushatë sabotimi në Europë është zbuluar nga inteligjenca britanike, e cila ka publikuar identitetet dhe fotot e 18 agjentëve sekretë të Kremlinit, duke i nënshtruar ata sanksioneve së bashku me tre njësi të GRU-së, shërbimit të inteligjencës ushtarake të Moskës: spiunëve në listë do t’u ndalohet udhëtimi, do t’u ngrihen asetet, si dhe do të ndalohen të merren me kompani britanike. Agjentët rusë besohet se qëndrojnë pas një sërë bombardimesh, zjarresh, dëmtimesh të infrastrukturës dhe sulmesh kibernetike në të gjithë Europën dhe Mbretërinë e Bashkuar, duke u përpjekur të minojnë mbështetjen për Ukrainën ndaj pushtimit të Moskës. Dy nga këta agjentë akuzohen gjithashtu për përgjimin e telefonit celular të Yulia Skripal, viktimës së një atentati me agjent nervor në Salisbury në vitin 2018, së bashku me babanë e saj, Sergei, një ish-spiun rus që dezertoi në Perëndim. Britanikët u ndihmuan në operacion nga FBI-ja amerikane dhe agjencitë e inteligjencës nga disa vende të NATO-s. Agjentët në fjalë janë një prej celulave që Kremlini dyshohet se po përdor në fushatën e spiunazhit për të destabilizuar Europën.