Gati gjysma e totalit të eksporteve shqiptare me vlerë thuajse 100 milionë euro që shkojnë drejt Shteteve të Bashkuara të Amerikës çdo vit përbëhet nga dy kategori, ajo e metaleve të çelikut dhe gizës dhe ajo e bimëve medicinale. Të dhënat zyrtare nga INSTAT tregojnë se në vitin 2024, bizneset shqiptare eksportuan 30 milionë euro çelik dhe gizë dhe 17 milionë euro të tjerë bimë medicinale, kryesisht sherebele. Pjesa tjetër e eksporteve mbulohet nga industria e tekstileve, prodhimeve bujqësore dhe peshkut. Vendimi i Donald Trump parashikohet që të prekë më shumë sektorin e bimëve medicinale, i cili çon përtej Atlantikut më shumë se një të tretën e prodhimit vendas. Ekspertët paralajmërojnë se importuesit amerikanë do të përpiqen t’ua faturojnë bizneseve shqiptare tarifën prej 10 për qind, ndërsa si alternativë në rast refuzimi kanë tregje të tjera më të mëdha, si Turqia apo India, ku bimët medicinale mund t’i përfitojnë me çmim më të lirë. Praktikisht, ndikimi i tarifave të vendosura nga Donald Trump në ekonominë shqiptare është i pashmangshëm. Duke pasur parasysh shkallën globale të tarifave, ato pritet që të cenojnë edhe eksportet shqiptare në vendet e Bashkimit Europian, por mund të kenë ndikim lehtësues për importet.