Bashkia e Tiranës ka nisur dëgjesat publike për projekt-buxhetin e vitit 2021. Në takimin me 10 të rinj, përfaqësues të organizatave të ndryshme, kryebashkiaku Erion Veliaj tha se prioriteti i bashkisë për vitin e ardhshëm do të jetë rindërtimi i shkollave, transformimi i Piramidës në një akademi inovacioni, si dhe financimi i start-up për të rinjtë. “Jemi një vit nga tërmeti shkatërrues i nëntorit, i cili na tregoi se shkollat e bëra në vitet ‘60-’70 ishin vetëm një tërmet larg, duke filluar nga shkolla ime e vjetër, “Sami Frashëri”, që nuk do bëhet në Paskuqan, por aty ku ka qenë, e tashmë janë hedhur themelet për t’u ringritur dy herë më e madhe, për të pritur fluksin me 1500 nxënës, si një nga shkollat më të kërkuara të Tiranës. Përtej histerisë që ngrihet për çdo projekt, “Samiu” është vetëm njëra nga 17 shkollat e reja që po bëjmë, bashkë me qeverinë, me projektin e rindërtimit të shkollave prej tërmetit. Ndërkohë, kishim një proces të nisur me 17 shkolla të tjera, në partneritet 50 me 50 në buxhet” Edhe sa i takon terreneve sportive do të vijojë puna për t’i shtuar më tej ato. “Do të vazhdojmë me terrenet sportive. Kemi filluar me palestrat në natyrë, duke qenë se gjithmonë e më shumë gjëra do të bëhen në natyrë. Liqeni i Farkës pothuajse po mbaron konturin e vet, duam të jetë një park i dytë. Shumë nga shkollat tona po i inkurajojmë të dalin në park, ish-shkolla ime e vjetër “20 Dhjetori” fare mirë mund të përdori tani parkun “Rinia”, një tjetër produkt i histerisë kolektive, por që ja ku është sot, një bizhu në qendër të Tiranës” Pjesë e rëndësishme e buxhetit të ri të bashkisë është transformimi i Piramidës, për ta kthyer në qendërn të inovacionit. “Është bërë rrethimi i Piramidës, aty do të fillojnë punimet për ta kthyer në një qendër të madhe rinore. Megjithatë, tek “Arena Kombëtare” filluam kurset e Tumo-s për moshat 12-18 vjeç. Kurse, për moshën më të madhe hapëm Akademinë e Zhvillimit të Softuerëve, te Protik-u pas Kryeministrisë, që janë kurse më të specializuara. Një pjesë e madhe e buxhetit tonë për këtë vit do të shkojë tek Piramida. Një pjesë do të financohet këtë vit, pjesa tjetër do të financohet në 2022-shin” Një tjetër projekt i bashkisë në partneritet me një akademi franceze është ngritja e një shkollë eksperimentale, që kultivon të gjithë start up-et në fushën e teknologjisë.