Britania e madhe ka dërguar trupa në Izrael si pjesë e një task-force ndërkombëtare të udhëhequr nga Shtetet e Bashkuara për të monitoruar armëpushimin në Gaza. Me kërkesë të SHBA-së, një kontingjent i vogël oficerësh planifikimi ushtarak është përfshirë në forcën e stabilizimit, të njohur si qendra e koordinimit civil-ushtarak, tha Ministria e Mbrojtjes. SHBA-të po ofrojnë deri në 200 trupa, por Britania nuk ka zbuluar se sa nga forcat e saj do të vendosen, megjithëse kuadri do të përfshijë një zëvendëskomandant me dy yje. Task-forca, e cila thuhet se përfshin trupa nga Egjipti, Katari, Turqia dhe Emiratet e Bashkuara Arabe, do të sigurojë respektimin e armëpushimit dhe do të ndihmojë me rrjedhën e ndihmës. Ajo shtë e ndarë nga forca më e madhe ndërkombëtare e stabilizimit që përfshihet në planin e paqes prej 20 pikash të Donald Trump dhe synon të ofrojë siguri afatgjatë për rajonin. Dislokimi u zbulua vetëm një javë pasi Yvette Cooper, Sekretarja e Jashtme, tha se nuk kishte “plane” për të dërguar trupa britanike në rajon si pjesë e forcës shumëkombëshe. Por armëpushimi është vënë në provë disa herë me ringjalljen e Hamasit në rrugët e Gazës pas tërheqjes së ushtrisë izraelite, shoqëruar nga një fushatë e përgjakshme hakmarrjeje kundër armiqve të brendshëm të grupit, që përfshinte të paktën një ekzekutim masiv publik.