Rusia ka sulmuar Ukrainën me 38 dronë gjatë natës, tha të martën forca ajrore e Kievit, duke shtuar se rrëzoi 26 prej tyre. Megjithatë, porti i Danubit për eksportimin e drithërave ukrainase, Izmail, u godit sërish. Dronët që mundën të canin mbrojtjen ajrore, goditën infrastrukturën përreth Izmailit, duke dëmtuar më shumë se 30 automjete dhe duke lënduar dy drejtues mjetesh gjatë sulmit që zgjati dy orë, tha guvernatori rajonal i Odesës, Oleg Kiper. Që nga korriku, kur Moska u tërhoq nga marrëveshja e ndërmjetësuar nga Kombet e Bashkuara e cila mundësonte eksportimin e sigurt të drithërave përmes Detit të Zi, Rusia ka shtuar sulmet ndaj infrastrukturës së Ukrainës për eksportimin e drithërave në jug të Odesës dhe në rajonet e Mikolavit. “U regjistrua lëshimi i 38 mjeteve ajrore pa pilot, Shahed-136/131, nga drejtime juglindore”, tha forca ajrore në Telegram. Forca ajrore dhe njësitë ushtarake “shkatërruan 26” dronë të prodhuar nga Irani, shtoi ajo. Izmail, i cili ndodhet në kufi me anëtaren e NATO-s, Rumaninë, është shndërruar në një rrugë kryesore të eksportit për prodhimet bujqësore të Ukrainës, qëkur Rusia u tërhoq nga marrëveshja për drithërat. Ky qytet është sulmuar vazhdimisht nga dronët rusë gjatë natës në javët e fundit. Rusia dhe Ukraina janë dy fuqi të mëdha bujqësore, furnizimet e të cilave janë jetike për sigurimin e ushqimit botëror. Pushtimi i Ukrainës nga Rusia në shkurt të vitit të kaluar, dhe sanksionet ndërkombëtare ndaj Rusisë, që pasuan, kanë destabilizuar tregjet botërore dhe furnizimin me drithëra.