Rusia dhe Ukraina shkëmbyen sulme me dronë gjatë natës duke lënë të plagosur e dëme të mëdha materiale. Në rajonin ukrainas të Dnipropetrovskut, tha guvernatori Oleksandr Hanzha, u plagosën tre persona. Një burrë u plagos në Dnipro, dhe dy të tjerë në Krivi Rih. Sulmet kanë shkaktuar zjarr, tha Hanzha. “Infrastruktura ka pësuar dëme, ka ndërprerje të rrymës”, theksoi ai. Sipas autoriteteve, mbrojtja ajrore ka arritur që të rrëzojë 27 dronë rusë. Ndërkohë në Rusi – shteti që nisi dhe pushtimin në shkallë të plotë të Ukrainës më 2022 – Ministria e Mbrojtjes ka raportuar se ka rrëzuar 59 dronë ukrainas. Nga këto fluturake, 11 u rrëzuan mbi Detin e Zi dhe dhjetë të tjerë në rajonin rus të Krasnodarit. Edhe Rusia ka raportuar për dëme nga sulmet.