Kryeqyteti i Rusisë, Moska, ka regjistruar këtë muaj reshjet më të mëdha të borës në më shumë se 200 vjet, thanë meteorologët e Universitetit Shtetëror të Moskës. Pamjet nga qyteti me rreth 13 milionë banorë tregonin banorët që përpiqeshin të kalonin përmes grumbujve të mëdhenj të borës në rrugët lagjeve por edhe në qendër. Trenat e udhëtarëve në zonën e Moskës regjistruan vonesa dhe makinat mbetën të bllokuara në trafik të enjten në mbrëmje. "Janari ishte një muaj i ftohtë dhe me borë të pazakontë në Moskë," tha universiteti në mediat sociale. Deri më 29 janar, Observatori Meteorologjik i Universitetit Shtetëror të Moskës kishte regjistruar sasinë më të lartë të borës në 203 vitet e fundit. Malet e borës në Moskë arritën deri në 60 centimetra në disa pjesë të kryeqytetit të enjten. Reshjet rekord të dëborës u "shkaktuan nga ciklonet e gjera me fronte të mprehta atmosferike që kalonin mbi rajonin e Moskës", tha observatori. Më herët këtë muaj, rajoni i Kamchatka-s në lindjen e largët të Rusisë shpalli gjendjen e emergjencës për shkak të një stuhie masive bore që e la qytetin e saj kryesor pjesërisht të paralizuar. Imazhet, të qarkulluara gjerësisht në internet, treguan grumbuj të mëdhenj dëbore që arrinin deri në katin e dytë të ndërtesave dhe njerëz që gërmonin nëpër rrugë ndërsa bora mbulonte makinat në të dyja anët.