Dy bombardues strategjikë rusë Tu-160, ose sic njihen ndryshe ‘Mjellmat e Bardha’, praktikuan lëshimin e armëve bërthamore vetëm disa kilometra në veri të Mbretërisë së bashkuar. Pamjet e shpërndara nga një agjenci ruse e lajmeve treguan avionët e frikshëm që ngriheshin dhe fluturonin pranë brigjeve të Mbretërisë së Bashkuar dhe hapësirës ajrore të NATO-s në një provokim të hapur. E gjithë kjo ndodh ndërsa presidenti rus Vladimir Putin ka urdhëruar zhvillimin e lojërave të luftës në pragun e NATO-s në një paralajmërim rrëqethës ndërsa ai vazhdon luftën e tij në Ukrainë. Lojëra lufte po zhvillohen në det në shumë rajone të botës në kuadër të stërvitjeve më të mëdha që rusia ka kryer që nga fundi i Luftës së Ftohtë, pretendojnë rusët. Mediat ruse pretenduan se avionët kishin praktikuar lëshimin e raketave të lundrimit me aftësi bërthamore mbi një objektiv armik vetëm disa kilometra larg nga toka, mbi detin Norvegjez. Fluturimi nëntë orësh mbi ujërat neutrale në veri të Shetland-it, si dhe mbi Detin Barents, ishte pjesë e stërvitjes Ocean-2024 të Vladimir Putinit. Si kundërpërgjigje, Norvegjia ngriti në fluturim avionët e saj luftarakë F-35, që identifikuan bombarduesit rusë dhe garantuan që ata të mos hynin në hapësirën e tyre ajrore. Rreth 400 anije luftarake, 120 avionë dhe 90,000 trupa do të marrin pjesë në stërvitjet që do të vazhdojnë deri më 16 shtator dhe do të mbahen në rajone të ndryshme të botës. Manovra po zhvillohen në oqeanin Paqësor dhe Arktik, si dhe në Detin Mesdhe, në Kaspik dhe Baltik.