Sekretari amerikan i Shtetit, Antony Blinken, ka mbërritur në izrael të martën në vizitën e tij të 11-të në rajon që kur ka nisur lufta mes Izraelit dhe Hamasit. Ai pritet të takohet me zyrtarët kryesorë, teksa SHBA-ja po synon të rinisë përpjekjet për armëpushim pas vrasjes së udhëheqësit kryesor të Hamasit, Yahya Sinëar. Blinken arriti në Izrael disa orë pasi Hezbollahu lëshoi një breshëri raketash në Izraelin qendror të martën. SHBA-ja, Egjipti dhe Katari për muaj të tërë kanë ndërmjetësuar bisedimet mes Izraelit dhe Hamasit, duke tentuar të arrihet një marrëveshje në mënyrë që Hamasi të lirojë pengjet në këmbim të përfundimit të luftës dhe të arrihet një armëpushim i qëndrueshëm në këmbim të lirimit të të burgosurve palestinezë. Si Izraeli, ashtu edhe Hamasi, akuzuan njëri-tjetrin për vendosje të kushteve të papranueshme gjatë verës dhe bisedimet u ndërprenë në muajin gusht. SHBA-ja po ashtu po tenton të ndërmjetësojë një marrëveshje armëpushimi mes Izraelit dhe Hezbollahut, por këto përpjekje dështuan kur muajin e kaluar u rritën tensionet dhe Izraeli kreu një sërë sulmesh, duke vrarë edhe liderin e grupit, Hassan Nasrallahun, dhe komandantë të tjerë të lartë. Izraeli aktualisht është duke kryer një operacion të madh në veri të Gazës. Po ashtu, Izraeli po kryen një sërë sulmesh në mbarë Libanin, duke shënjestruar Hezbollahun.