Shtetet e Bashkuara kanë propozuar ish-shefin e korporatës Mastercard, Ajay Banga, që të drejtojë Bankën Botërore. Lajmi u bë me dije nga Presidenti Joe Biden. Ai vlerësoi eksperiencën e rëndësishme të zotit Banga përballë sfidave globale, përfshirë ato që lidhen me ndryshimet klimatike. Njoftimi vjen pak ditë pasi presidenti i Bankës Botërore David Malpas, i emëruar gjatë mandatit të Presidentit Donald Trump, njoftoi planet për largim në muajin qershor. Mandati i tij pesëvjeçar do të përfundonte prillin e vitit që vjen. Trajtimi i ndikimit nga ndryshimet klimatike nga institucioni i përbërë nga 170 vende të botës përbën një përparësi kryesore për Shtetet e Bashkuara. Figura kryesore për klimën i kanë kërkuar administratës së Presidentit Biden që të shfrytëzojë largimin e hershëm të zotit Malpass si një mundësi për të reformuar institucionin e fuqishëm financiar, i cili është përballur me kritika në rritje lidhur me qasjen ndaj vendeve më pak të pasura dhe përpjekjeve për të adresuar ndryshimet klimatike. Zoti Banga, aktualisht drejtues i lartë në firmën private “General Atlantic”, ka më shumë se 30 vjet përvojë në biznes. Ai ka shërbyer në role të ndryshme në korporatën Mastercard dhe në bordet drejtuese të Kryqit të Kuq Amerikan. Ai ka lindur në Indi dhe është kandidati i parë me origjinë indiane që pritet të drejtojë Bankën Botërore. Sekretarja e Thesarit, Janet Yellen, tha në një deklaratë se përvoja e zotit Banga do të ndihmojë në arritjen e objektivave të Bankës Botërore për eleminimin e varfërisë ekstreme dhe zgjerimin e mirëqenies së përbashkët, ndërsa ndërmerr veprime të duhura që institucioni të përmbushë qëllimet ambicioze për klimën dhe uljen e ndotjes. Pamjet: AFP