Shtetet e Bashkuara të Amerikës do t’i dhurojnë Kosovës një numër të konsiderueshëm vaksinash anti-covid. Presidentja Vjosa Osmani, përmes një statusi në Facebook, ka bërë të ditur se presidenti i SHBA, Joe Biden, i është përgjigjur pozitivisht kërkesës së saj për caktimin e një sasie vaksinash për Kosovën. “Më 19 mars 2021, i kam shkruar Presidentit Biden duke kërkuar mbështetjen e Shteteve të Bashkuara për dhurimin e vaksinave në kohën kur Kosova ishte i vetmi shtet në Evropë që ende nuk kishte filluar administrimin e tyre,” shkruan Osmani në status. “Më 19 Prill 2021 Presidenti Biden u përgjigj pozitivisht në të cilën ai u zotua për ta trajtuar kërkesën tonë rreth vaksinave. Sot, ne jemi të lumtur të njoftojmë se Presidenti Biden, në emër të SHBA-ve, ka vendosur të dhurojë një numër të rëndësishëm të vaksinave COVID-19 për Republikën e Kosovës,” shton më tej ajo. Osmani nuk ka bërë të ditur se sa do të jetë numri i vaksinave, por shton se njoftimi zyrtar i sotëm është tjetër dëshmi e mbështetjes së palëkundur që Kosova gëzon historikisht nga Shtetet e Bashkuara të Amerikës.