Ish-kryeministri Sali Berisha i ka besuar drejtimin e fushatës elektorale për zgjedhjet vendore të 6 Marsit në Shkodër, ish-ministrit dhe ish-deputetit gjatë qeverisjes së tij, Arben Imamit. Ky i fundit do të drejtojë fushatën e kandidatit të koalicionit ‘Shtëpia e Lirisë’ Bardh Spahisë. Për Imamin, ky post mund të konsiderohet si një rikthim në politikë. Pavarësisht se ka qenë një ndër kritikët më të fortë të kryedemokratit Lulzim Basha, ai nuk ka qenë pjesë e grupit të Komisionit të Rithemelimit të PD-së dhe nuk ka marrë pjesë as në Kuvendin e 11 Dhjetorit 2021 të thirrur nga ish-kryeministri Sali Berisha, ditën kur u vendos shkarkimi i Bashës si kryetar i PD dhe u miratuan disa ndryshime statutore, që presin verdiktin nga Gjykata e Tiranës. Imami nuk është zgjedhur rastësisht nga Berisdha për Shkodrën, pasi ka qenë drejtues politik për PD në këtë qark deri në vitin 2015 dhe në vijim për disa vite, derisa nisi edhe përplasja mes tij dhe Lulzim Bashës.