Mjaftoi deklarata e sekretarit amerikan të shtetit, Antony Blinken për shpalljen ‘non grata’ të ish presidentit dhe ish kryeminsitrit, Sali Berisha, që ky i fundit të largohej përfundimisht nga ‘hija politike’ disavjeçare, për t’u rikthyer në arenën politike dhe për të filluar luftën gjyqësore kundër sekretarit Blinken. Në retorikën e tij, Berisha thuajse i zeroi provat e departmentit amerikan të shtetit, duke i mbajtur sytë nga Gjykata Korrektuese e Parisit. Në këtë gjykatë Berisha ka një padi vetëm ndaj sekretarit Antony Blinken, të cilin e akuzon për shpifje të pabazuar. Megjithatë, kuadri ligjor për luftën kundër korrupsionit, i publikuar nga Shtëpia e Bardhë, parashikon se në procesin e rishikimit ndërinstitucional për shpalljen non grata, marrin pjesë ekspertët e 15 institucioneve, duke filluar nga departamenti i mbrojtjes, agjencia Qendrore e Inteligjencës e deri tek Departamenti i Drejtësisë. Teksa vendimi është në nivel shtetëror nuk dihet përse akuzat e ish kryeministrit i drejtohen vetëm një personi.