Menjëherë pas deklaratës së ish-kryeministrit Sali Berisha, se Enkelejd Alibeaj dhe Lulzim Basha janë të përjashtuar përfundimisht nga PD, ka reaguar ish-kryetari me autorizim. Nëpërmjet një postimi në rrjetet sociale, Alibeaj shprehet se deklarata vjen si një tentativë për shfajësim nga humbja e zgjedhjeve. “Pasi u bojkotua masivisht nga demokratët dhe shqiptarët, Sali Berisha vazhdon të hedhë llum dhe baltë si e vetmja mënyrë për t’i mbijetuar katastrofës së vet elektorale. I përjashtuari i madh nga politika, me 103 mijë vota demokratësh kundër tij e me 200 mijë të tjerë që e refuzuan dëshmoi qartë kush i ka shërbyer kujt!”, shprehet ndër të tjera Alibeaj. Sipas tij, “Edi Ramës i duhet Sali Berisha dhe soji e sorollopi i tij i korruptuar për të justifikuar korrupsionin ku është zhytur ai dhe qeveria e tij”. Në fund të postimit të tij, Alibeaj justifikon vendimin për dorëheqje teksa e konsideron si akt për të mirën e demokratëve. “Unë nuk kam qenë kurrë e nuk jam me parimin e Xenit, për tu paguar për gjithçka. Sali, dorëheqja ime është akt që shkon për të mirën e demokratëve, largimi yt është çlirim dhe frymarrje për ta”, thekson Alibeaj.