Dy persona janë arrestuar në Shkodër gjatë një patrullimi të zakonshëm të policisë. Uniformat blu njoftojnë se të arrestuarit janë të moshës 32 dhe 34 vjeç. Ata po lëviznin me një motomjet në lagjen “Ndoc Mazi”, kur thirrjes së policisë për të ndaluar i janë përgjigjur duke u larguar me shpejtësi. Policia është vënë në ndjekje të tyre dhe pak momente më vonë i ka ndaluar. Gjatë kontrolleve, policia tha se lindën dyshimet se motomjeti me të cilin dy të arrestuarit po lëviznin të ishte vjedhur në Tiranë. Dyshimet lindën pasi targa dhe numri i shasisë nuk përputheshin. Policia ushtroi kontrolle në dy makinat e këtyre shtetasve, ku gjeti më pas një bidon me benzinë, një sasi droge e llojit kokainë dhe një silenciator. Nga provat materiale të gjetur ndaj dy të rinjve, dyshohet se ata janë aktivë në veprimtari kriminale në Shkodër. Megjithatë, policia nuk jep detaje nëse të arrestuarit janë persona me precedentë penalë apo jo.