Presidenti Bajram Begaj ka pritur homologun e tij nga Franca Emmanuel Macron, si dhe delegacionin që e shoqëron këtë të fundit në vizitën në Shqipëri. Gjatë takimit Presidenti Begaj tha se kjo vizitë tregon interesin e përbashkët për forcimin e marrëdhënieve dypalëshe, rritjes së sigurisë dhe zhvillimit të rajonit të Ballkanit Perëndimor. Më tej Begaj shprehu mirënjohjen, për mbështetjen që Franca dhe Presidenti Macron i kanë dhënë e vazhdojnë i japin procesit të zgjerimit dhe të integrimit europian të Shqipërisë dhe të vendeve të tjera të rajonit të Ballkanit Perëndimor, nëpërmjet Procesit të Berlinit. Presidenti falenderoi gjithashtu Macron, për kontributin në mbështetje të dialogut midis Kosovës dhe Serbisë, sidomos përmes planit franko-gjerman, duke theksuar nevojën e mbështetjes së mëtejshme të këtij dialogu, por edhe të nevojës së dënimit të akteve të dhunës dhe të provokimeve në komunat e Veriut të Kosovës.