Presidenti Bajram Begaj nuk ka dekretuar ndryshimet në kabinetin qeveritar të prezantuara nga Edi Rama gjatë mbledhjes së Kongresit të Partisë Socialiste. Burime nga presidenca konfirmojnë se pas propozimeve të Kryeministrit Edi Rama për ndryshimet në kabinet qeveritar po kryhen të gjitha procedurat që kërkon ligji deri në dekretimin e tyre. Për këtë arsye, seanca plenare urgjente e thirrur për në orën 18:00 të kësaj të hëne është shtyrë për ditën e martë. Kryeministri Edi Rama u ka kërkuar deputetëve që të qëndrojnë në gatishmëri dhe të jenë të përgatitur që për çdo rast e çdo orar që mund të thirret seanca plenare të Kuvendit të marrin masat që të jenë të pranishëm. Rama prezantoi të dielën ndryshime në kabinetin qeveritar, sipas të cilave ikën ministri i Mbrojtjes, Niko Peleshi dhe ministri i Financave, Ervin Mete. Në vend të tyre emërohen Pirro Vëngu dhe Petrit Malaj. Ndryshimet cekën edhe Ministrinë e Brendshme, ku Taulant Balla largohet për të marrë postin e ministrit të Shtetit për Marrëdhëniet me Parlamentin. Ndërkohë, kryesimin e Kuvendit Rama ja besoi Elisa Spiropalit dhe nënkryetar caktoi Bledi Çuçin, ndërsa Niko Peleshi do të drejtojë grupin e socialistëve.