Vendet e Bashkimit Europian janë pajtuar të premten për miratimin e një pakete të re sanksionesh kundër Rusisë, si dhe për uljen e çmimit tavan për eksportet e naftës ruse. “BE-ja sapo miratoi një nga paketat më të forta të sanksioneve kundër Rusisë deri më tani”, tha shefja e politikës së jashtme të BE-së, Kaja Kallas. Diplomatja tha se çdo sanksion I vënë e dobëson aftësinë e Rusisë për luftë. “Mesazhi është i qartë: Evropa nuk do të tërhiqet nga mbështetja për Ukrainën. BE-ja do të vazhdojë të rrisë presionin derisa Rusia të ndalojë luftën”, shtoi Kallas. Si pjesë e sanksioneve të reja që synojnë t’i dobësojnë financimet për luftën e Rusisë, diplomatët thanë se BE-ja është pajtuar ta ulë çmimin tavan për naftën ruse të eksportuar në vendet e treta 15 për qind nën vlerën e tregut. Sipas skemës së re të BE-së, niveli i ri do të nisë me 47.6 dollarë. Gjithashtu, zyrtarët thanë se BE-ja do të vendosë në listën e zezë mbi 100 anije të tjera të ashtuquajturës “flotë në hije”, që janë cisterna të vjetra të përdorura nga Rusia. BE ka paralajmëruar se do të marrë masa edhe për tubacionet e gazit në Detin Baltik, Nord Stream 1 dhe 2, që r’u pamundësojë punën.