Bashkimi Europian ka përsëritur thirrjet drejtuar Kosovës që të pezullojë menjëherë operacionet e policisë rreth godinave të komunave në veri të Kosovës. Sipas Brukselit, ky është hapi i parë i domosdoshëm për të ulur tensionet. Deklarata u bë fillimisht nga shefi i diplomacisë së BE-së, Josep Borrell dhe u përsërit më pas nga zëdhënësi i tij, Peter Stano. Në një dalje me gazetarët, zëdhënësi u pyet nëse pas zhvillimeve të fundit ka dështuar procesi i dialogut, tha se bisedimet tani janë më me rëndësi se kurrë. Në orët e para të së martës, zyra e përfaqësuesit të lartë të BE-së njoftoi se ai kishte zhvilluar një bisedë telefonike me kryeministrin e Kosovës, Albin Kurti dhe më pas me Presidentin serb, Aleksandër Vuçiç. Për të ulur tensionet, BE po përpiqet që të organizojë të mërkurën në Sllovaki një takim mes Albin Kurtit dhe Aleksandër Vuçiçit. Por, Presidenti serb paralajmëroi një ditë më parë se mund ta bojkotojë takimin që organizohet në Bratisllavë.