Ministrat e Jashtëm të Bashkimit Evropian kanë rënë dakord për një mission detar që ka si qëllim të mbrojë anijet nga militantët Huthi në Detin e Kuq, thanë të hënën disa diplomatë për agjencinë e lajmeve dpa. I quajtur Aspided [Mburoja] sipas një fjale të vjetër greke, misioni nënkupton se evropianët do të dërgojnë anije luftarake dhe sisteme të paralajmërimit të hershëm në Detin e Kuq, Gjirin e Adenit dhe ujërat përreth. Pjesëtarët e misionit kanë urdhër që të qëllojnë me armë kundër militantëve, vetëm nëse ata sulmojnë të parët. Komanda operacionale do të jetë në qytetin grek Larisa. Huthit e Jemenit po sulmojnë anijet në rajon, si shenjë hakmarrjeje për veprimet ushtarake izraelite në Rripin e Gazës. Një zyrtar i BE-së tha të premten se shteti më i dëmtuar prej këtyre veprimeve nuk është Izraeli por Egjipti, pasi zvogëlimi i trafikut ka shkaktuar 40 për qind humbje të të ardhurave për Autoritetin e Kanalit të Suezit. Edhe ekonomia e BE-së thuhet se është dëmtuar këtë periudhë. Komisioneri i BE-së për Ekonomi, Paolo Gentilioni, u tha gazetarëve ditë më parë se “duke qënë se anijet janë detyruar të ndryshojnë rrugën në dërgesat mes Azisë dhe BE-së, edhe çmimet e këtyre dërgesave janë rritur për gati 400 për qind”.