Bashkimi Europian ka folur për herë të parë në lidhje me protestat masive që kanë shoqëruar Serbinë për javë me radhë. Deklarata e parë qortuese ndaj Aleksandër Vuçiç, është njëkohësisht e matur me kritikat ndaj Beogradit. “Vendi duhet të përmbushë reformat e BE-së, veçanërisht për të ndërmarrë hapa vendimtarë drejt lirisë së medias, luftës kundër korrupsionit dhe reformës zgjedhore”, shkroi presidentja e Komisionit Evropian Ursula von der Leyen të martën në mbrëmje pas një darke pune me presidentin serb. Takimi, ku mori pjesë edhe presidenti i Këshillit, Antonio Costa, trajtoi situatën aktuale politike në Serbi dhe rrugën e saj drejt anëtarësimit në BE dhe erdhi në një moment kritik për Vuçiqin, i cili nuk ka mundur të shuajë bllokadat dhe protestat e studentëve që kanë vazhduar për më shumë se katër muaj.