Bashkimi Evropian ka reaguar për vendimin e 31 janarit të Komisionit Qendror të Zgjedhjeve në Kosovë, për miratimin e rezultateve të partive të tjera për zgjedhjet e 28 dhjetorit, dhe mosmiratimin e rezultateve të Listës Serbe. “BE përsërit thirrjen e saj për depolitizimin e punës së KQZ-së, në përputhje me raportin e Misionit të Vëzhgimit të Zgjedhjeve të BE-së, dhe u bën thirrje të gjitha partive që të punojnë së bashku, në përputhje me Kushtetutën”, thuhet në reagimin e Zyrës së Shtypit të BE-së. Më tej në reagim u theksua se është e rëndësishme që të gjithë deputetët e zgjedhur të jenë në gjendje të sigurojnë ulëset e tyre në Kuvendin e ri të Kosovës. BE rikujton gjithashtu se legjislatura e ardhshme e Kosovës duhet të përshpejtojë reformat e orientuara drejt BE-së dhe të ratifikojë marrëveshjet e pezulluara që lidhen me Planin e Rritjes.