Bashkimi Europian pret që zgjedhjet e 14 shkurtit në Kosovë të organizohen në mënyrë të besueshme, gjithëpërfshirëse dhe transparente në gjithë territorin e Kosovës, përfshirë edhe në mjediset ku kandidojnë pjesëtarët e komunitetit serb. Këtë porosi BE e ka dhënë duke u përgjigjur në pyetjet rreth vërejtjeve të mëhershme se në mesin e serbëve të Kosovës në të kaluarën ka pasur presion dhe frikësime të kandidatëve dhe mbështetësve, të cilët nuk ishin nga Lista Sërpska, të cilën e mbështet Qeveria e Serbisë. “Opozita dinamike dhe një garë elektorale janë pjesë e demokracisë pluraliste”, është përgjigjur një zëdhënës i Komisionit Europian. KE edhe në Raportin e Progresit të miratuar vitin e kaluar, kishte konstatuar se zgjedhjet në Kosovë ishin zhvilluar në përgjithësi në mënyrë të duhur me garë konstruktive, përpos në ato pjesw tw vendit ku garonin serbw të Kosovës. Kwtu, sipas raportit të Komisionit Evropian, ka pasur presione dhe frikësime të atyre që kandidonin kundër Listës Sërpska apo mbështetësve të tyre. Në pyetjen se çfarë ka bërë Bashkimi Europian për të siguruar që edhe në pjesët e banuara me serbë në Kosovë të mos përsëriten problemet që janë parë në të kaluarën, Komisioni Europian thote se “BE-ja rregullisht diskuton me të gjitha çështjet përkatëse, përfshirë edhe kur është fjala për zgjedhjet me bashkëbiseduesit relevantë, dhe nënvizon nevojën për të implementuar rekomandimet e misionit vëzhgues të BE-së”. Nga Brukseli është paralajmëruar se përfaqësuesi i Bashkimit Europian, së bashku me akterë tjerë ndërkombëtarë, do të jenë të pranishëm në ditën e zgjedhjeve në një numër vendvotimesh në Kosovë për të ndjekur procesin zgjedhor.