Pas heqjes së vizave për shqiptarët e Kosovës, Këshilli I Bashkimit Europian, ka vendosur këtë të hënë të heqë vizat edhe për serbët që jetojnë në Kosovë, por që refuzojnë të marrin një pasaportë kosovare. Ky vendim për shtetasit me pasaportë serbe në Kosovë, u mor në takimin e ministrave të jashtëm të BE-së, ndërsa me hyrjen në fuqi të rregullores, e cila do të ndodhë në ditën e 20-të pas botimit në Fletoren Zyrtare të BE-së, ajo do të bëhet e zbatueshme në të gjitha shtetet anëtare të BE-së. "Këshilli miratoi një rregullore që siguron që i gjithë rajoni i Ballkanit Perëndimor t'i nënshtrohet të njëjtit regjim vizash, duke hequr përjashtimin e aplikuar më parë për mbajtësit e pasaportave serbe të lëshuara nga Drejtoria Koordinuese Serbe", thuhet në komunikatën për shtyp të lëshuar në përfundim të takimit. Ka qenë Komisioni Evropian ai që në nëntor të vitit të kaluar ka propozuar heqjen e vizave për shtetasin kosovar që posedojnë vetëm dokumente të lëshuara nga organet serbe. Ky vendim asokohe hasi kritika nga autoritetet kosovare që janë shprehur se BE-ja po ndikon negativisht në procesin e integrimit të serbëve të Kosovë.