Bashkimi Evropian pritet të heqë masat ndëshkuese ndaj Kosovës, të vendosura që prej vitit 2023 pas rritjes së tensioneve në veriun e vendit, të banuar kryesisht nga komuniteti serb. Lajmi u bë i ditur nga komisionerja për Zgjerim, Marta Kos, në Bruksel, gjatë prezantimit të progres-raportit për vendet kandidate për në BE, ku u vlerësua përparimi i Kosovës në disa fusha, përfshirë luftën kundër korrupsionit. “Përsa i përket masave ndëshkuese ndaj Kosovës në progres-raport, ne besojmë se mund t’i heqim këto masa sa më shpejt të jetë e mundur, pasi dhe zgjedhjet lokale u zhvilluan në mënyrë të qetë dhe normale”, deklaroi Marta Kos. Masat ndaj Kosovës u vendosën në qershor të vitit 2023, kur Bashkimi Evropian akuzoi Qeverinë e Kosovës për nxitje të tensioneve etnike në veri. Pas gati dy vitesh, këto kufizime po hiqen gradualisht. Liderët politikë të Kosovës kanë kërkuar në mënyrë të përsëritur heqjen e tyre, duke i konsideruar të padrejta.