Grupi Parlamentar i Frontit Evropian, udhëhequr nga Bashkimit Demokratik për Integrim kërkon zyrtarisht krijimin e një Komisioni Parlamentar të posaçëm për të hetuar, atë që e cilëson si qasje selektive dhe të njëanshme të sistemit të drejtësisë së kontrolluar nga qeveria në trajtimin e tragjedisë në Koçan. Sipas BDI, ky komision duhet të ngrihet menjëherë dhe të përfshijë përfaqësues të OSBE-së, si dhe përfaqësues nga ambasadat e Shteteve të Bashkuara të Amerikës dhe vendeve anëtare të Bashkimit Europian në cilësinë e vëzhguesve me qëllim garantimin e një hetimi të drejtë, të pavarur dhe transparent. Në lidhje me tragjedinë është arrestuar ish zv.ministri shqiptar i ekonomisë, ndërsa nuk ka asnjë zyrtar aktual të lartë të prangosur për përgjegjësitë se si është lejuar aktiviteti i diskotekës me licencë të përfunduar prej një viti. 60 persona humbën jetën të djegur dhe të asfiksuar nga tymi dhe 170 të tjerë mbetën të plagosur nga zjarri që përfshiu diskotekën. Hetimet zbuluan se aktiviteti ushtrohej pa licencë dhe jashtë rregullave të sigurisë.