Një rast prostitucioni është zbuluar nga Policia e Elbasanit në lagjen “5 Maji”, si rezultat i operacionit policor të koduar “Booking”. Hetimet e zhvilluara me metoda proaktive, në bashkëpunim me Prokurorinë, zbuluan një apartament të marrë me qira, ku dy shtetase nga Kazakistani ushtronin veprimtari të paligjshme. Në përfundim të operacionit u arrestuan në flagrancë dy shtetaset, ndërsa pronarja e apartamentit, u procedua penalisht në gjendje të lirë. Gjatë kontrolleve, u sekuestruan shuma parash në valuta të ndryshme, tre aparate celularë dhe dokumentet personale të të arrestuarave. Policia bën me dije se vetëm një javë më parë janë zbuluar edhe dy apartamente të tjera të marra me qira nga shtetase të huaja, që dyshohet se janë përdorur për ushtrim prostitucioni.