Policia e Kosovës ka bastisur shtëpitë e ish-këshilltarit të Hashim Thaçit, Besnik Shala dhe ish-shefit të Agjencisë Kombëtare të Inteligjencës, Bashkim Smakaj. Bastisja e të dy objekteve u krye me urdhër të zyrës së Prokurorit Special në Prishtinë, teksa policia bllokoi rrugën “Agim Prodani’ ku ndodhen shtëpitë e dy personave, të cilat iu nënshtruan kontrollit. Avokati i ish-këshilltarit të Thaçit, Blerim Qerkini pranoi bastisjen në shtëpinë e Besnik Shalës, teksa tha se vetëm më vonë do të japë detaje në lidhje me këtë urdhër të Prokurorisë Speciale. Edhe zyra e Prokurorisë Speciale pranoi operacionin në nëj reagim për median në Kosovë. “Zyra e Prokurorit të Specializuar është duke zhvilluar operacione të vazhdueshme në Kosovë. Operacionet po mbështeten nga Policia e Kosovës dhe Misioni i Bashkimit Evropian për Sundimin e Ligjit në Kosovë (EULEX)”, thuhet në reagimin e zyrës së Prokurorisë Speciale. Besnik Shala ka qenë këshilltar I Hashim Thaçit gjatë kohës që ky I fundit ka qenë president I Republikës së Kosovës, teksa bastisja mund të ketë lidhje me procesin ndaj tij në Hagë. Edhe Bashkim Smakaj, u emërua në krye të Agjencisë Kombëtare të Inteligjencës në Kosovë në vitin 2009, pikërisht nga ish-presidenti Hashim Thaçi.