Ekonomisë shqiptare do t’i duhet kohë që ta marrë veten nga goditja që pësoi nga pandemia e Covid 19. Banka e Shqipërisë parashikon një tkurrje të aktivitetit ekonomik gjatë vitit 2020. Në Raportin e politikës monetare për tremujorin e tretë, Banka e Shqipërisë analizon se rimëkëmbja e ekonomike e vendit pas heqjes së masave bllokuese qe shkaktoi pandemia Covid-19 po rezulton me ritme shumë të ulëta. Raporti thekson se rënia e aktivitetit ekonomik pritet të kulmojë në tremujorin e dytë të vitit, e shkaktuar nga mbyllja e aktiviteteve ekonomike jothelbësore dhe rënia e të ardhurave të familjeve dhe bizneseve. Lehtësimi i masave për kufizimin e përhapjes së pandemisë do t’i hapë rrugë rimëkëmbjes së ekonomisë, ndonëse rritja ekonomike pritet të vijojë të mbetet negative edhe në dy tremujorët e fundit të vitit në krahasim me vitin e kaluar.