Me kërkesë të prokurorisë, trupi gjykues për rastin ‘Banjska’ në Gjykatën Themelore në Prishtinë, ka vendosur që seanca e kësaj të hëne të zhvillohet e mbyllur për publikun dhe mediat, për shkak të dëshmisë së dëshmitarit anonim A2. Sipas prokurorit të rastit, Naim Abazi, nëse kjo seancë do mbahej e hapur rrezikohet edhe i akuzuari dhe procesi gjyësor. Kërkesa u kundërshtua nga avokati I Blagoje Spasojeviqit, Ljubomir Pantoviç, I cili tha se prokurori nuk ka dhënë arsye konkrete për të cilat prania e publikut do të ndikonte negativisht te dëshmitari A2. Pas dëgjimit të palëve, kryetari i trupit gjykues, Arben Hoti, vendosi që seanca të mbyllet për publikun gjatë dëshmisë së dëshmitarit të mbrojtur. Më 11 shtator të 2024-ës, Prokuroria Speciale e Kosovës ngriti aktakuzë ndaj 45 personave, në mesin e tyre edhe Millan Radoiçiç, për sulmin e armatosur në Banjskë. Për tre të akuzuarit e sulmit terrorist ku mbeti i vrarë rreshteri policor Afrim Bunjaku, Vladimir Toliq, Dushan Maksimoviq dhe Blagoje Spasojeviq, procedura është veçuar nga të tjerët. Të akuzuarit, sipas aktakuzës kanë pasur role të ndryshme brenda grupit të tyre kriminal, “duke nisur nga organizimi dhe drejtimi i aktiviteteve terroriste deri te financimi dhe pastrimi i parave”.