Gjykata Kushtetuese nuk ka marrë sërish vendim për çështjen e pezullimit të zv.Kryeministres, Belinda Balluku. Trupa prej tetë anëtarësh vijoi këtë të martë seancën këshillimore për më shumë se 2 orë dhe në përfundim i vetmi lajm që doli ishte ai i shtyrjes së vendimit për një datë tjetër. Vendimi i gjykatës do të shuante debatin nëse masa e pezullimit e vendosur ndaj Ballukut nga Gjykata e Posaçme është shkelje kompetencash të pushtetit ekzekutiv apo jo. Kërkesa e Qeverisë për masat e vendosura ndaj Ballukut kanë mbërritur në Kushtetuese rreth gjashtë javë më pare, ndërsa në Kuvend SPAK ka dërguar kërkesën për heqjen e imunitetit të saj. Kjo kërkesë është depozituar nga SPAK në Kuvend pas vendimit të Gjykatës Kushtetuese, që më 22 dhjetor të vitit të kaluar pezulloi pezullimin e caktuar ndaj zv.Kryeministres nga ana e Gjykatës së Posaçme.